الطحينة_كريم الكراميل

الطحينة
حطى كم معلقة طحينه فى طبق حسب الكمية اللى تحبيها وتحطى شوية ميه صغيرين اوى وتقلبيها كويس هتلاقيها بتجمد معاكى وتزودى المية شوية شوية وتقلبي زي الاول برضه لحد ما توصل للكثافه اللى تحبيها وتحطى لها ملح وفلفل اسود وشوية خل وشوية زيت وممكن رشه لمون وشطة وكمان ممكن تدقى لها فص توم حسب رغبتك يعني وفيه ناس بتحب تحط عليها معلقتين زبادي كمان بتبقى طعمها حلو ورشى على وشها بقدونس مفروم
بالنسبة للاكل بتاع عيد جوازى حاضر عينيا هكملهولك
وبالنسبة للحلويات ان مش بريمو فيها هو كام صنف بعرف اعمله كويس وبحاول فى الباقيين
هههههههه
بصي يا قمر اسهل حاجة وبتطلع تحفة مع اى حد
صينية الكريم كراميل
المقادير
مقادير الكريم
لتر لبن
5 بيضات كبار
فانيليا
كوب الاربع سكر
جوز هند حسب الرغبه يعني فى حدود 3 معالق كبار مثلا
مقادير الكراميل
كوب الا ربع سكر
1-الاول نحط مقدار السكر بتاع الكراميل فى صينية صغيرة على نار هاديه ونسيبه لحد ما يسيح مع التقليب لحد ما يبقى لونه زي الكراميل اللى بيتشرى كده يعني غامق شوية بس ميسودش مننا علشان ميتحرقش
2-وبعدين نعمل الكريم نحط كل المكونات بتاعته فى الخلاط وناخد بالنا ما نزودش الفانيليا اوى علشان ما يبقاش طعمها مر ونضربه كويس فى الخلاط
3- نصب الخليط على الكراميل اللى فى الصينية ولو لقينا الكراميل جامد ما نقلقش عادى جدا
4-نحط الصينية فى صينية اكبر منها فيها ميه(حمام مائي يعني) وبعدين ندخله الفرن على نار متوسطة من تحت ونار هاديه اوى من فوق ونسيبه حوالى ساعه
وناخد بالنا الوش يبقى يادوب اصفر اول ما نحس لون الوش بدا يتغير نطفى عليه من فوق ونسيب النار شغاله من تحت بس
5- نسيب الكريم كراميل يبرد خالص وبعدين ندخله التلاجه لحد ما يبرد لان طعمه مش حلو الا اما يبرد
وبعدين قطعيه وقدميه وممكن تقدمى جمبه فى الطبق شوية صوص كراميل من بتاعه وفراولة
وعد مش هيبوظ منك وهيعجب الكل