المكرونة بالصلصة_كباب الحلة

ايه رايكم نعمل مكرونة وجمبها كباب حلة وطحينه؟
بصراحه احلى حاجة فى المكرونة ان معظم الرجالة بتحبها وسهله وتنفع جمبها اصناف كتير اوى
اول حاجة المكرونة
1-هنحط حلة مية تغلى على النار ومعاها شوية ملح ومعلقتين زيت
2-اول ما المية تغلى نحط المكرونة ونقلبها علشان ما تلزقش ونسيبها تغلى وكل شوية نقلبها وافضل طريقة تعرفى المكرونة استوت ولا لا انك تدوقيها هههههههههطبعا مفيش اسهل من كده
المهم نسوى المكرونة كويس
فيه ناس بتسوي المكرونة نص نص وتسيبها تكمل سواها فى الصلصة بس بحس انها بتطلع ناشفه وطعمها مش ظريف
المهم هنسوي المكرونة كويس وبعدين نصفيها ونغسلها بمية باردة من الحنفيه علشان تنزل النشا اللى فيها
نعمل الصلصة للمكرونة وعندك 3 طرق اما بتوم او بصل او زيت وبس
انا بعملها بزيت بس هتحطى شوية زيت على النار وتحطى عليهم صلصة الطماطم ولو عاوزة تعمليها ببصل او توم او الاتنين سوا يبقى هتشوحي البصل او التوم من غير ما تحرقيهم يادوب لونهم يصفر
حاجة مهمة هنا برضه اوقات بنحس ان فيه حد بيطبخ الاكل له ريحه حلوة كده وناس تانيه اكلهم بنحسه مايع ومالوش طعم 0من اهم الاسباب بقى اللى تدى ريحه حلوة وطعم مضبوط للاكل تهدى عليه وخصوصا مثلا واحنا بنشوح البصل او التوم نهدى عليه علشان ريحته تطلع قبل ما نحط عليه الطماطم مش نعلى النار وكله على بعضه وسلق فى سلق والاكل يطلع من غير طعم لالالالالا
3-نسيب الصلصة تتسبك خالص ونحط الملح والفلفل الاسود وشوية سكر زي ما اتفقنا وبعدين نضيف المكرونة ونقلب ويادوب نسيبهم على النار دقيقة وبعدين نطفى وتتقدم وممكن نرش رشة زيت على المكرونة ونقلبها قبل ما تتقدم
نيجي لتانى حاجة كباب الحلة
1- نغسل اللحمة كويس ونحطها فى حلة ونقطع عليها بصلة كبيررررررة وحته سمنة بلدي صغنونة وممكن نستغنى عنها ونسيبها على نار هاديه لحد ما تستوى والبصل هينزل ميته ما نحاولش نزود ميه الا لما نحسها نشفت ومحتاجه مية ويادوب نزود شوية بشوية لحد ما اللحمه تستوى نضيفلها الملح وهى فى نص السوا كده والفلفل الاسود وفص حيهان وتكمل سوى كويس يعني ما تبقاش بتشد فى الاكل لا تبقى مستوية اوى وتتقدم ومعاها الصوص بتاعها اللى باقى فيها
سلطة الطحينة بقى عادى ولو عاوزينها ااقولهالك برضه من عونيا الاتنين
وممكن كمان نعمل جمبهم بطاطس محمرة