موضوع مهم عن العدسات اللاصقة

عاوزة اكلمكم عن العدسات اللاصقة


تقريبا معظمنا جربها وفى بنات كتير نفسها تجربها


للاسف انتشرت ظاهرة خطر جدا وهى تأجير العدسات


اوعوا يابنات من الحكاية دى العدسات بتنقل الميكروبات والجراثيم لو لبستها اكتر من واحدة وممكن تسبب التهابات خطيرة فى العين وممكن تسبب قرحة فى القرنية ولاقدر الله ممكن توصل للعمى(ده مش كلامى ده كلام اطباء العيون)


اللى عرفته ان الكوافيرات مش بيتخلصوا من المحلول بعد مابتنتهى فترة استخدامه
غير ان فى كتير منهم بيستخدم انواع محاليل رخيصة ورديئة جدااااااا
وكمان ممكن يستخدموا عدسات صلاحيتها انتهت وفى ناس اشتكت من الحكاية دى لان العدسة اتقطعت لما جم يشيلوها من عنيهم


غير كده كمان فى كوافيرات بيستخدموا الملح والمية فى غسيل العدسة لما ترجعله بعد التأجير ودى كارثة طبعا


يبقى الاحسن لما تحبى تستخدمى العدسات تشتريها لنفسك وتكون ماركة كويسة ومضمونة وتحتفظى بيها وماينفعش حتى تسلفيها لقريباتك او صديقاتك ولو لمرة واحدة وتستخدمى المحلول الخاص بيها ويكون ماركة مضمونة وطبعا ترميه بعد شهر من تاريخ فتح العبوة وتغسلى العدسات بعد كل استخدام بالمحلول وتغيرى المحلول اللى فى العلبة واوعى ييجى عليها مية ابدا او تنامى بيها او تغسلى وشك وهى فى عنيكى وكمان ماتنزليش بيها البحر او البيسين وماتتعرضيش بيها فى الشمس لفترة طويلة وكمان ماتجيبيش ناحيتها برفانات او اى بخار


نصيحة مهمة جدا:ماتشتريش العدسات كده منك لنفسك لازم الاول تسألى دكتور عيون لانه المفروض يحددلك نوع العدسة وماركتها وده علشان الحساسية ولازم كمان يتأكد من عدم وجود جفاف فى العين
واوعي تستخدميها وانتي بتعملي شعرك عند الكوافير مثلا او سشوار في البيت ومتتعرضيش لأي حراره بتاتا وهي في عينيكي

معلش طولت عليكم ويارب تستتفيدوا